TULAY NG MAGABI AT AKSIDENTENG NAKARAAN (2)

ISA namang kaibigan ko ang nakapanayam ko na tawagin na lang nating si Dave Olevon, 37, ng Brgy. Daine 2 sa Indang, Cavite na nagbahagi rin ng kwentong katatakutan patungkol sa tulay ng Magabi.

Sa kanyang salaysay, nangyari ang kakaibang karanasan no­ong ginagawa ang tulay ng Magabi para maging konkreto na ito.

Ang kapatid niya ang isa sa mga nag­trabaho noon sa ginawang kon­kretong tulay ng Magabi, stay-in sa lugar ang ka­patid niya at mga katrabaho nito.

Mula sa kanilang ginawang tigilan at tulugan hindi kala­yuan sa tulay, pagsapit ng gabi ay nakaririnig sila ng boses ng matandang lalaki at bata na nag-uusap sa ilalim ng tulay.  

Minsang lumabas daw ang isa sa matapang na katrabaho ng kapatid niya para tingnan ang nadirinig na boses subali’t pagbalik sa kanilang gina­wang tuluyan at tulugan ay nagpantal-pantal na ang buong ka­tawan at mukha at inapoy na ng lagnat ang katrabaho ng kanyang kapatid.

Matapos ang pang­yayaring iyon ay mas naniwala na ang kanyang kapatid at mga katrabaho nito na may ibang nakatira o nakabantay sa tulay ng Magabi.

Idinagdag pa ni Dave na isang katropa niya na sumundo sa bayan sa asawa na pauwi ng Daine galing sa trabaho at pagdaan nila sa tulay na iyon, nakarinig sila ng boses na bumulong kaya nagmabilis sila para makalayo agad ng tulay.  

Noong araw ay may pampasaherong sasakyan galing ng Daine ang paluwas subalit nang maka­lampas ng tulay para bumwel paahon pa­puntang Tambo Munti Kulit, namatay ang makina at umatras ang sasakyan, nahulog ito sa tulay at bu­magsak sa ilog.

Sugatan ang mga pasahero at dalawa sa pasahero ang binawian ng buhay.

Nabatid na bago ito, napatingin ang driver sa salamin sa kanyang harapan, nakita niyang nakasakay rin kasama ng mga pasahero sa likod ang isang nilalang na naka­balot ng itim na tela na sa pakiwari ay tila si kamatayan.

TULAY NG MAGABI AT AKSIDENTENG NAKARAAN (2)
Source: Filipino Pinoys