2021 AVC Asian Women’s Volleyball Championship, ipinagpaliban

MANILA Philippines – Ipinagpaliban muna sa susunod na taon ang 2021 AVC Asian Women’s Volleyball Championship na gaganapin sa Pilipinas dahil sa patuloy na pagtaas ng kaso ng Covid-19 sa bansa.

Ayon kay Philippine National Volleyball Federation (PNVF) official Tonyboy Liao, ang hosting ng bansa sa continental championship na nakatakda sa October 24-31 ay gagawin na lamang sa 2022.

“The Asian Seniors Women’s Championship is rescheduled next year. No date announced yet,” wika ni National Teams Commission chairman Liao.

Nalagay ang Philippine women’s volleyball team sa Pool A kasama ang Kazakhstan, Chinese-Taipei at Uzbekistan sa eight-team tournament na gagawin sa Bren Z. Guiao Convention Center sa San Fernando Pampanga.

Sasabak din ang Thailand, South Korea, Iran at Australia sa Pool B.

Idinagdag ni Liao na tumigil ang Philippine women’s pool sa training camp sa Batangas pero inaasahang magkakaroon ulit ito ng panibagong bubble training sa Subic o Pampanga para sa paghahanda nito sa 2021 AVC Asian Women’s Club Volleyball Championship sa October 1 hanggang 7 sa Nakhon Ratchasima, Thailand.

“They will continue their training for the Asian Club Championship but presently there’s no venue for them to train after they left Batangas,” wika nito. “They’re now in Manila and awaiting where they can train, Subic or San Fernando, Pampanga.”JC