SSS, BI lumagda ng kasunduan sa social security coverage ng contractual employees

MANILA, Philippines – Lumagda ng isang Memorandum of Agreement ang Bureau of Immigration (BI) at Social Security System (SSS) sa BI main office sa Intramuros, Manila na magbibigay ng social security coverage sa mga job order at contract of service workers sa nasabing ahensiya ng gobyerno.

Nabatid kina SSS President at Chief Executive Officer Rolando Ledesma Macasaet at BI Commissioner Norman G. Tansingco na hindi bababa sa 800 job order at contract of service workers na naglilingkod sa immigration regulatory body ang makikinabang sa nasabing programa.

Sa ilalim ng nasabing kasunduan, ang mga job order at mga contractual ng BI ay makakakuha ng SSS coverage sa ilalim ng KaSSSama sa Coverage Program.

Sa ilalim ng programa, ang mga manggagawang ito ng BI ay mauuri bilang mga self-employed na miyembro ng SSS.

Nakasaad din sa kasunduan na ang BI ay magsisilbing Coverage and Collection Partner ng SSS.

Dahil dito, pinahintulutan ng SSS ang BI na kolektahin at ipadala ang buwanang kontribusyon ng mga manggagawang ito sa pamamagitan ng salary-deduction scheme.

“The SSS aims to secure the future of all job order and contract of service workers in government agencies nationwide. Although these employees work in government offices, they are considered private self-employed members and are not covered by the Government Service Insurance System,” ani Macasaet.

Paliwanag ni Macasaet, bilang mga self-employed na miyembro ng SSS, sila ay may karapatan na makatanggap ng social security benefits tulad ng sickness, maternity, disability, retirement, funeral at death benefits.

Makakakuha din sila ng karagdagang coverage mula sa Employees’ Compensation Program (ECP) para sa mga contingencies na nauugnay sa trabaho.

Bukod dito, maaari silang mag-apply para sa iba’t ibang member loan na inaalok ng SSS tulad ng salary at calamity loan.

Nagpasalamat naman si Commissioner Tansingco sa SSS sa pagdadala ng mga benepisyo sa social security sa kanilang job order at contract of service workers na kanilang maaasahan sa mga oras ng contingencies.

Samantala, bumisita si Macasaet sa KaSSSama sa Coverage Program servicing counter na itinakda para sa okasyon sa punong tanggapan ng BI sa Intramuros, Maynila.

Ang mga tauhan ng SSS mula sa SSS Manila Branch ay namamahala sa online at onsite servicing counter upang tulungan ang mga manggagawa ng BI sa paggawa ng online na account sa SSS sa pamamagitan ng My.SSS facility, pagpaparehistro sa SSS bilang self-employed na miyembro, pagbuo ng Payment Reference Number para sa pagbabayad ng kontribusyon, pag-verify ng member’s mga talaan, at pagsagot sa mga katanungan sa iba’t ibang benepisyo at programa ng pautang ng SSS.

Nabatid na simula nitong Disyembre 2022 ay nakikipagtulungan na ang SSS sa 1,531 local government units (LGUs), 499 national government agencies, 111 state universities and colleges (SUCs), at 68 local water districts na sumasaklaw sa job order at mga contract of service worker sa pamamagitan ng KaSSSama sa Coverage Program na may kabuuang koleksyon na lampas sa P5.5 bilyon. JAY Reyes

SSS, BI lumagda ng kasunduan sa social security coverage ng contractual employees
Source: Filipino Pinoys