Review sa K to 10 curriculum, nasa ‘final stage’ na – DepEd

MANILA, Philippines – Malapit nang matapos ang nagpapatuloy na review ng K to 10 curriculum dahil ito ay nasa “final stage” na, ayon kay Department of Education (DepEd) spokesperson Atty. Michael Poa nitong Biyernes, Marso 17.

“We will have a rollout once finalized,” dagdag pa niya.

Ang review sa K to 10 curriculum ay nagsimula pa sa nakaraang administrasyon habang ang curriculum review sa Grade 11 hanggang 12 o Senior High School ay nagsimula noong Nobyembre 2022.

Isinasagawa ang konsultasyon sa mga eksperto upang matukoy ang mga aralin na dapat tutukan sa pag-aaral.

Ipinaliwanag ni Poa na ang long-term solution ng DepEd sa learning loss ay ang pagrerebisa sa curriculum ng K to 12 program.

Layon din ng revision na ma-decongest ang curriculum at mas mapagtuunan ng pansin ang literacy at numeracy na pundasyon umano ng mga estudyante upang hindi mahirapan sa mga susunod na grade level.

“It’s really to recalibrate. Ayaw nating sabihin kaagad na babawasan, but we will recalibrate iyong ating curriculum. Kasi nakita natin na congested, so ang dami daming learning competencies. So pwede talagang magbawas tayo ng competencies para po mapagtuunan talaga natin at mabigyan natin ng panahon iyong core subjects,” ani Poa.

Sa Basic Education Report noong Enero, nangako si Vice President at Education Secretary Sara Duterte “to produce competent, job-ready, active, and responsible citizens” at “to revise the K to 12 curriculum to make them more responsive to our aspiration as a nation, to develop lifelong learners who are imbued with 21st-century skills, discipline, and patriotism.” RNT/JGC

Review sa K to 10 curriculum, nasa ‘final stage’ na – DepEd
Source: Filipino Pinoys