CAAP: Cessna plane na nawala sa Isabela, ‘di pa rin nakikita

MANILA, Philippines- Hindi pa rin natatagpuan ang Cessna airplane na nawala matapos tumulak sa Cauayan Domestic Airport sa Isabela province, ayon sa Civil Aviation Authority of the Philippines (CAAP).

Inihayag ng CAAP sa report nito na may petsang February 3 na patuloy ang koordinasyon nito sa search and rescue (SAR) operations mula nang mawala ng eroplano noong January 24.  Subalit, hindi pa rin natutukoy ang posibleng crash site ng aircraft.

Lumikha naman ang Philippine Aeronautical Rescue Coordination Center ng memorandum para kay CAAP Director General (ret.) Capt. Manuel Tamayo.

“(We) maintained close coordination regarding search and rescue operation efforts regarding the disappearance of RP-C1174 after its last position report to Cauayan Control Tower on 24 January 2023 […] Extended the hours of operations and early opening of Cauayan airport to support the SAR mission operational requirements,” ayon sa report.

“Search operations conducted by PAF [Philippine Air Force] Sokol helicopter with callsign ANGEL925 yielded negative sighting.  Launched maritime search using small surface vessels and frogmen of PCG (Philippine Coast Guard) within the area of Divilacan Bay,” dagdag nito.

Tiniyak din sa nasabing report “to exhaust all possible SAR efforts” para madetermina ang lokasyon ng nawawalng eroplano.

Noong January 24, idineklarang nawawala ang six-seater Cessna 206 plane isang oras matapos umalis ng airport. Nakatakda itong lumapag sa coastal town ng Maconacon.

Matapos hindi matagpuan agad, inanunsyo ng CAAP na ang missing airplane ay nasa distressed phase na nangangahulugang nanganganib ang eroplano at mismong mga sakay nito.

Nitong January 29 naman, sinabi ng local government ng Isabela na may natagpuan itong posibleng bahagi ng wreckage malapit sa bundok sa Barangay Sapinit, Divilacan Isabela. RNT/SA

CAAP: Cessna plane na nawala sa Isabela, ‘di pa rin nakikita
Source: Filipino Pinoys