Karamihan sa mga batang tinamaan ng COVID sa PGH, gumaling na

MANILA, Philippines – Gumaling na sa coronavirus disease (COVID-19) ang karamihan sa mga batang tinaaman ng sakit na nasa Philippine General Hospital (PGH).

Ayon kay PGH spokesperson Dr. Jonas del Rosario, walong bata ang nasa pediatric ward ng ospital ang nagpositibo sa COVID-19.

“Ang maganda naman po kahit naging severe o critical yung mga bata, majority po talaga nakaka-recover. It might take a longer time,” sinabi ni Del Rosario sa TeleRadyo.

Aniya, apat pang pasyente ang naghihintay na ma-admit sa 12-bed pediatric ward ng PGH.

Ayon pa kay Del Rosario, ang mga batang pasyente ay nasa buwang taong gulang lamang hanggang 15 anyos.

Dagdag nito na mababa pa ang fatality rate sa mga bata nasa anim na porsyento.

Una nang sinabi ng mga eksperto na ang mga batang may sakit ay kadalasang nagkakaroon ng malalang sintomas ng COVID-19. RNT/ELM